Mo-undergo og operasyon si Pope Leo XIV sa umaabot nga mga adlaw human makit-an ang usa ka bukol o nodule sa iyang baga atol sa bag-ong medical examination.
Sa iyang 71 anyos nga edad, gipadayag sa Santo Papa atol sa iyang sinemanal nga Angelus address sa St. Peter’s Square nga nadiskobrehan ang bukol sa sayong stage niini ug limitado lamang sa usa ka bahin sa baga.
Sumala kaniya, gitambagan siya sa mga doktor nga operahan aron matangtang ang maong bukol, busa iyang gisunod ang ilang tambag ug giiskedyul na ang operasyon.
Base sa pahayag sa Vatican press office, gilauman nga himoon ang operasyon sa Gemelli Hospital sa Rome, Italy, ug mokabat sa mga usa ka semana ang gipaabot nga panahon sa iyang pagkaayo.
Sa pagkakaron, wala pa giklaro kung makaapekto ba sa iyang mga kalihokan ug biyahe sa gawas sa nasud ang operasyon. Lakip sa iyang gikatakdang pagbisita ang Uruguay, Argentina ug Peru gikan Nobyembre 6 hangtod 17.
Samtang, nagpadala og mensahe sa suporta si Italian Prime Minister Giorgia Meloni, nga miingon nga nakahatag kaniya og kasigurohan ang kalmado nga paagi sa pagsulti sa Santo Papa atol sa Angelus.
Giawhag usab sa mga lider sa Simbahang Katolika sa Uruguay ug Argentina ang mga magtutuo nga iampo ang malampusong operasyon nga dali ug hingpit ang pagkaayo sa Santo Papa.
Si Pope Leo XIV, nga natawo sa Chicago sa Estados Unidos, nahimong unang Amerikanong napili isip Santo Papa kaniadtong Mayo 8, 2025, human sa pagkamatay ni Pope Francis niadtong Abril 21 sa maong tuig.
