Gisuportahan ni Davao City Councilor Danilo C. Dayanghirang, chairman sa Committee on Finance, Ways and Means, and Appropriations ang pagpalig-on sa imprastraktura sa enerhiya aron matubag ang nagkadakong panginahanglan sa kuryente ug masuportahan ang pagtubo sa ekonomiya sa Davao Region.
Lakip sa mga gihisgotang proyekto ang Therma South Inc. (TSI) Phase II Project, nga naglakip sa Units 3 ug 4 nga giplanong tukoron sa Barangay Binugao, Toril District, Davao City, ug Barangay Inawayan, Santa Cruz, Davao del Sur. Sumala sa iyang pahayag, importante ang lig-on nga suplay sa kuryente aron masuportahan ang pagpalapad sa negosyo, industriya, logistika ug pag-eksport sa mga produktong agrikultural gikan sa Davao Region ug silingang mga lugar.
Ang maong proyekto kabahin sa mga paningkamot nga mapalig-on ang seguridad sa enerhiya ug mapadayon ang papel sa Davao isip importanteng sentro sa komersiyo ug logistika sa Mindanao.
