DAVAO CITY – Gikumpirma sa Police Regional Office 11 nga sulod pa lamang sa upat ka bulan sa tuig 2023, niabot na sa lapas usa ka gatus ang mga natalang kaso sa pagpanglugos dinhi sa rehiyon onse.
Sumala sa datos nga gipagawas sa buhatan, anaa sa 128 ang natalag rape cases sa Davao Region. Sa maong ihap, pinakataas ang natalang ihap nga 35 gikan sa Davao City Police Office, samtang 32 sa Davao del Norte, 26 sa Davao del Sur, 18 sa Davao de Oro, 11 sa Davao Oriental, ug 6 ka mga kaso sa Davao Occidental.
Kasamtangang gipaningkamutan sa matag kapulisan sa rehiyon ang pagpatuman og mga lakang aron mapugngan ang daw nagkadaghang kaso sa pagpanglugos, susama na lamang sa gilusad nga programa sa DCPO nga Oplan KILOS kon Kababainhan/Kalalakin-an/Kabatan-unan Igiya Laban sa Pagpanlugos nga nagsugod ning nakalabayng bulan sa Marso.
Nanawagan sab ang PRO 11 sa ubang hingtundang ahensya nga tabangan ang kapulisan nga mapugngan na ang maong krimen.
via || Bombo LJF
