Misaka na sa kapin 900 ang suspected cases sa Ebola sa Democratic Republic of the Congo, sumala sa World Health Organization (WHO) Director-General Tedros Adhanom Ghebreyesus. Sumala pa, padayon ang gipakusog nga surveillance efforts sa maong nasud aron mapugngan ang pagtaas pa sa kaso sa maong makamatay nga sakit.
Matod pa sa WHO chief, gikan sa kapin 900 ka suspected cases, 101 niini ang kumpirmadong kaso. Dugang pa niini, sa report niadtong weekend, gikumpirma sa health ministry sa DR Congo nga miabot na sa 204 ang namatay tungod sa viral disease nga natala sa tulo ka probinsiya sa central African country.
Lakip sa mga nahimong basehan sa WHO ang deklarasyon niadtong Mayo 15 nga nagdeklara sa outbreak sa Ebola tungod sa Bundibugyo strain sa Congo, diin sa pagkakaron wala pa’y aprubadong bakuna o tambal batok niini.
Sa laing bahin, gipahimangno sa mga health authorities nga ang Ebola usa ka makamatay nga sakit nga matakod pinaagi sa direktang kontak sa bodily fluids sa usa ka infected nga tawo, ug mahimo kining mosangpot sa severe bleeding, organ failure, ug kamatayon. Tungod niini, mas gipahugtan pa karon sa mga awtoridad ang surveillance, contact tracing, ug public health interventions sa mga apektadong lugar aron mapugngan ang dugang nga pagdako sa kaso ug malikayan ang pagkalapad sa outbreak sa ubang rehiyon.
Nagpadayon usab ang panawagan sa publiko nga sundon ang health protocols ug magpabiling mabinantayon aron mapugngan ang pagkatakod sa maong sakit.
