DAVAO CITY – Kompirmadong gilugos ug gipatay ang 28-anyos nga arkitek nga babae kinsa nakaplagan ang patayn’g lawas niini sa usa ka Banana Plantation sa Dacudao, Calinan ning dakbayan sa Davao kagahapon.
Kini ang gibutyag sa tigpamaba sa Davao City Police Office (DCPO) nga si PMaj. Catherine Dela Rey. Matud kaniya, gideklarang kasong Rape with Homicide sa Calinan Police station ang nahitabong pagpatay kang Vlanche Marie Laruan Braga, subay sab sa report sa gipahigayong autopsy sa Regional Forensic Unit 11.
Dugang pa ni Dela Rey, nga wala pay nakitaang Person with interest sanglit on-going pa ang imbestigasyon diin ilang ginalantaw ang tanang angulo.
Diin subay sa mga nakasaksi matud pa adunay usa ka pasahero ang nakauban sa biktima nga nakasakay sab sa “baobao” nga gilantaw sab sa kapulisan kun kini kakonsabo sa suspek.
Kon uggaling dili man, nanawagan na lamang si Dela Rey nga makig-lambigit na lamang sa kapulisan ug ireport kon unsay nahibaw-an tungod gipasalig sab niini nga mahimong “confidential” ang identity sa nakasaksi.
Gikanayon ni Dela rey nga nakadawat na lamang og report ang kapulisan gikan sa usa ka trabahante sa maong Banana Plantation nga mupahigayon unta og injection sa fertiziler sa tanum, sanglit dako na lamang matuda ang kakurat niini human nakaplagan kini og patay’ng lawas sa usa ka tawo rason nga midangop gilayon kini sa kapulisan.
Sa pagkompirma sa kapulisan, nasuta na lamang nga ang biktima, mao ang gitahong missing sa Calinan Police Station.
Ning kasamtangan, mipagawas na usab og mandu gikan kang City Director PCol. Alberto Lupaz, nag dili lamang bugtong Calinan Police Station ang mag-imbestiga sa kaso ni Braga kundi lakip na ang Police Station 1-9 nga tabangan ang calinan PSP og pa-imbestiga sa tanang Ombak o bao-bao tungod sa posibilidad nga dili taga Calinan ang suspek.
Samtang, nagmugna na ang DCPO og Special Investigation Task Group (SITG) nga mututok sa kaso aron mapapaspas ang pag-imbestiga sa kaso.
