Nagkasinabot ang Iran ug Oman alang sa malinawong pag-agi sa mga barko sa Strait of Hormuz, subay sa kumpirmasyon ni Foreign Ministry Spokesman Esmaeil Baqaei ang maong kasabotan, apan wala na siya maghatag og dugang detalye. Matod niya, anaa na sa “final stages” ang kasabotan.
Gipasidaan usab ni Baqaei nga ang kasabotan sa Oman dili garantiya sa luwas nga pag-agi sa mga barko sa maong agianan, tungod kay maapektuhan gihapon ang seguridad sa Strait of Hormuz sa mga aksyon sa Estados Unidos batok sa mga pantalan sa Iran.
Human gilunsad sa Estados Unidos ug Israel ang pag-atake batok sa Iran kaniadtong Pebrero, gibabagan sa Iran ang dakong bahin sa Strait of Hormuz, usa sa labing importante nga agianan sa kalibutan alang sa transportasyon sa lana ug liquefied natural gas.
Una nang mipasidaan si US President Donald Trump nga mohimo sila og grabeng aksyon batok sa Iran kon dili dayon ablihan ang Strait of Hormuz.
