Gipahigayon sa Armed Forces of the Philippines ug Japan Self-Defense Forces ang ikaunom nga joint humanitarian ug disaster relief exercise nga “Doshin-Bayanihan 6-26” gikan Oktubre 4 hangtod 9.
Ang maong training gihimo sa Mactan-Benito Ebuen Air Base sa Cebu, Daniel Z. Romualdez Airport sa Leyte ug Puerto Princesa International Airport sa Palawan.
Apil sa mga drills ang airdrop operations, load ug offload training, ingon man takeoff ug landing exercises gamit ang night vision goggles.
Lakip sa gitutokan sa maong exercise ang mass casualty response ug aeromedical evacuation aron mapalambo ang koordinasyon ug kapasidad sa duha ka nasod sa pagtubag sa mga emerhensya ug kalamidad.
Gipadala sa Japan Air Self-Defense Force ang usa ka KC-130H military aircraft ug kapin 40 ka personnel gikan sa Air Support Command, samtang C-130H aircraft ug mga personnel sa Philippine Air Force ang miapil sa maong pagsasanay.
Maghatag usab og fuel support ang Philippine Air Force sa mga aircraft sa Japan Air Self-Defense Force atol sa exercise.
Kahinumdoman nga nagsugod ang Doshin-Bayanihan kaniadtong Hulyo 2021 sa Clark Air Base sa Pampanga, isip joint exercise tali sa Japan ug Pilipinas alang sa humanitarian assistance ug disaster relief.
Ang pulong nga “Doshin” nagpasabot og same mind o shared purpose, nga nagsimbolo sa pagtinabangay ug koordinasyon sa duha ka nasod.
