Giduso pag-usab ni Senate President Sherwin Gatchalian ang pagdali sa pagsabatas sa GINHAWA measure aron matabangan ang mga manggagawa nga mapadayon ang ilang gahum sa pagpamalit taliwala sa padayong pagsaka sa presyo sa petrolyo.
Sumala pa ni Gatchalian, dugang nga palas-anon sa mga konsumidor ang bag-ong pagsaka sa presyo sa lana, ilabina kung magpadayon ang tensyon sa Middle East nga mahimong makapadugang sa presyo sa krudo sa tibuok kalibotan.
Dugang pa, dili lamang mga motorista ang direktang maapektuhan sa mahal nga petrolyo, tungod kay mahimong mosunod ang pagsaka sa presyo sa ubang importanteng palaliton ug serbisyo, lakip ang kuryente, tungod sa pagtaas sa gasto sa enerhiya.Matud ni Gatchalian, kinahanglan paspason ang pagpatuman sa GINHAWA aron dili mas samot nga mawad-an og gahum sa pagpamalit ang mga Pilipino tungod sa mahal nga krudo, ilabina ang mga minimum wage earner.
Pinaagi sa Senate Bill No. 56 o Granting Increase in Take-Home Pay for All Working Filipinos Act, gisugyot ni Gatchalian nga ipataas ang income tax exemption threshold gikan sa P250,000 ngadto sa P400,000 nga tinuig nga kita.Lakip usab sa gisugyot nga kausaban ang pagtaas sa cap sa mga bonus nga dili sakop sa buhis, gikan sa P90,000 ngadto sa P150,000.
Tumong sa maong mga kausaban nga madugangan ang kantidad sa sweldo nga madala pauli sa mga ordinaryong manggagawa, ilabina samtang nagkataas ang presyo sa pagkaon, transportasyon, kuryente ug uban pang pangunang panginahanglanon.
Sa pagkakaron, padayon ang pagduso sa maong panukala sa Senado isip usa sa mga paagi nga gitan-aw aron mapagaan ang pinansyal nga palas-anon sa mga manggagawa samtang nag-atubang ang nasod sa epekto sa pagsaka sa presyo sa enerhiya.
