Modangop sa Supreme Court ang Office of the Vice President aron kuwestiyonon ang desisyon sa Commission on Audit nga nagpabiling balido ang disallowance sa kapin ₱73 milyong confidential funds nga gigasto kaniadtong 2022.
Sumala kang defense counsel Atty. Michael Poa, adunay kalabotan kini sa 15-page resolusyon sa COA nga nagpamatuod sa Notice of Disallowance tungod sa giingong pagkapakyas sa OVP sa pagsunod sa mga lagda sa paggamit sa confidential funds.
Plano sa OVP nga mosang-at og petition for certiorari ubos sa Rule 65 aron kuwestiyonon ang giingong grave abuse of discretion sa COA sa pagpagawas sa maong resolusyon.
Gipasabot ni Poa nga giandam na nila ang posibilidad nga dili pabor sa OVP ang desisyon. Wala pa usab niya makastorya Bise Presidente kabahin niini, apan mokonsulta una sila niini ayha pormal nga mosang-at sa apela.
Giinsistir usab niini nga aduna pay ubang legal nga remedyo nga mahimong gamiton sa OVP ug sa mga indibidwal nga naapektuhan sa maong disallowance.
Kahinumdoman nga ang paggamit sa confidential funds sa OVP usa usab sa mga alegasyong gilakip sa impeachment case batok kang Vice President Sara Duterte.
