DAVAO CITY – Nahimong emosyonal si kanhi Davao City Mayor ug Pangulong Rodrigo Duterte atol sa pakighimamat niini sa mga residente sa Brgy. Pandaitan, Paquibato, ning dakbayan atol sa ilahang Araw ng Barangay niadtong milabayng adlaw.
Subling nagpasalamat si Digong sa mga misuporta ug misalig kaniya sa katumanan sa iyang pangandoy nga mamahimong pangulo sa nasud.
Sumala pa sa mayor, nahimong kabahin ang Paquibato sa iyang kinabuhi sukad sa iyang paglingkod isip mayor sa Davao City.
Gipasalig sab ni Digong nga mabuhatan og dalan ang ubang bahin sa Paquibato padulong sa sentro nga bahin sa distrito pinaagi sa pag-amutay sa mga kongresista aron sementuhan ang ubang dalan sa maong distrito.
Taliwala pa man sa naunang pahayag nga mga pagbatikos kang Pangulong Bongbong Marcos, gipaklaro ni Digong nga dili matud pa siya oposisyon sa administrasyon.
Nagsaad sab ang kanhi mayor nga kon mahitabo ang paglingkod ni Vice President Sara Duterte isip Pangulo, iyahang ipalihok sa anak ang reporma sa yuta alang sa mga yanong nanginahanglan.
via || Bombo LJF
