Gipang-apod-apod ang 2,347 ka transparent bags ngadto sa mga estudyante sa Jesus Soriano National High School sa Davao City pinaagi sa inisyatibo sa buhatan ni Congressman Paolo “Pulong” Duterte, Vice Mayor Rodrigo “Rigo” Duterte II ug PPP Partylist.
Personal nga nangulo sa pagpanghatag sa mga bag si Vice Mayor Rigo isip kabahin sa paningkamot nga mapalig-on ang seguridad sulod sa eskwelahan ug makatabang usab sa pagpakunhod sa galastuhan sa mga ginikanan.
Nagpasalamat si School Principal Emy B. Goc-Ong sa maong tabang, nga matud pa niini, makapasayon sa pag-inspeksyon sa mga gamit sa mga estudyante ug makapadaginot sa mga ginikanan nga dili na kinahanglan mopalit og bag nga transparent.
Gihimo ang maong inisyatibo aron malikayan ang pagsulod sa mga gidili nga butang sa eskwelahan ug mapugngan ang posibleng insidente sama sa school shooting.
Atol sa kalihokan, gidasig usab ni Vice Mayor Rigo ang mga estudyante nga dili magduha-duha sa pagduol sa ilang mga magtutudlo, higala, ginikanan ug lokal nga mga lider kon adunay problema o kabalaka.
Pinaagi niini, gilaom nga mas mapalambo ang kaluwasan sa mga estudyante ug ang ilang pagbati nga adunay komunidad nga andam mosuporta kanila.











