-- ADVERTISEMENT --

Gitan-aw sa nagkadaiyang eksperto isip oportunidad alang sa industriya sa Pilipinas ang pag-apil sa nasud sa Pax Silica initiative nga gipangulohan sa Estados Unidos, bisan pa sa nagpadayon nga mga protesta batok sa maong alyansa.

Atol sa Mining Industry Symposium kaniadtong Huwebes,Nobyembre 19, 2026 gipahayag ni geologist Graciano Yumul nga mahimong makabenepisyo ang lokal nga industriya sa pagmina tungod sa taas nga panginahanglan ug limitado nga suplay sa mga kritikal nga mineral nga gikinahanglan sa pagpalambo sa artificial intelligence o AI ug uban pang modernong teknolohiya.

Lakip sa gitumbok ang mga mineral nga adunay dakong panginahanglan susama sa copper, nickel, gold, lithium, rare earth minerals, tungsten, uranium ug graphite.

Samtang, gipasiugda ni Board of Investments Governor Marjorie Ramos Samaniego nga kinahanglan dili lang kutob sa pagmina ug pag-eksport sa raw mineral ang kalamboan sa nasud, kinahanglan mapalambo usab ang lokal nga pagproseso, manufacturing ug inobasyon aron mas modako ang bili sa mga mineral sa Pilipinas.

Apan gipahimangnoan ni Yumul nga kinahanglan masabtan sa nasud ang geopolitikal nga epekto sa pag-apil sa maong inisyatibo, ilabina sa nagpadayon nga kompetisyon tali sa Estados Unidos ug China.

-- ADVERTISEMENT --

Gipasiugda usab niya nga kinahanglan mapanalipdan sa Pilipinas ang kaugalingong interes ug malikayan nga mahimong instrumento lamang sa panagbangi sa dagkong gahom sa kalibotan.

Usa usab sa iyang gipunting nga babag sa pagpalambo sa lokal nga industriya sa pagmina ug pagproseso sa mineral mao ang taas nga presyo sa kuryente sa nasud.

Samtang, gipadayag ni Samaniego nga nagtuon ang gobyerno og mga pamaagi aron mapakunhod ang gasto sa elektrisidad ug magamit ang renewable energy sa pagpalig-on sa lokal nga mga industriya.