Andam na ang Commission on Elections o COMELEC alang sa botohan sa katawhan nga ipahigayon sa Naga City karong Sabado, Nobyembre 21, kalabot sa panukalang himuong Highly Urbanized City o HUC ang maong lugar.
Tumong sa komisyon nga maabot ang 75 porsyentong partisipasyon sa mga botante sa maong botohan.
Matod ni COMELEC Chairman George Erwin Garcia, naipadala na sa Naga City ang tanang gikinahanglang kagamitan, lakip na ang mga balota nga gamiton sa botohan.
Gilauman usab sa komisyon nga mahibal-an na ang resulta sa botohan sa mismong gabii sa Sabado, diin kapin 119,000 ka botante ang gilauman nga moapil sa pagpili.
Padayon usab ang lokal nga kagamhanan sa paghatag og impormasyon sa publiko mahitungod sa kamahinungdanon sa maong botohan ug sa mahimong epekto sa paghimong Highly Urbanized City sa Naga.
Matod ni Garcia, naglaum sila nga taas ang partisipasyon sa mga botante tungod kay bisan ang mga kabatan-onan nahibalo na sa ipahigayong botohan.











