Gipahugtan pa ni Ombudsman Jesus Crispin Remulla ang lifestyle check sa mga opisyal ug kawani sa Bureau of Internal Revenue (BIR) ug Bureau of Customs (BOC) aron mapugngan ang posibleng korapsyon ug ilegal nga pagpangolekta og buhis.
Gipahibalo kini ni Remulla atol sa Town Hall Meeting sa Philippine Chamber of Commerce and Industry sa Taguig niadtong Nobyembre 14, kasabay sa panumpa sa katungdanan sa bag-ong natudlong mga commissioner sa duha ka ahensiya.
Matud sa Ombudsman, adunay mga report nga nadawat ang iyang opisina bahin sa mga kawani nga nangayo og dagkong kantidad sa buhis gikan sa mga negosyante apan wala mohatag og tukmang resibo.
Gipasiugda ni Remulla nga ang lifestyle check gitumong sa pagpanalipod sa kwarta sa katawhan ug sa mga negosyanteng posibleng biktima sa maong mga ilegal nga kalihokan.
Gipahinumdoman usab niya nga ang tanang transaksyon sa gobyerno kinahanglan adunay resibo, ug ang pagpangolekta og kwarta nga walay tukmang dokumento mahimong timailhan sa korapsyon.
