Gipahibalo na sa tech company nga Microsoft ang hingpit nga pagbalik sa ilang mga serbisyo kaniadtong Sabado, Nobyembre 14,2026 Sabado, alas 12:15 sa udto sa Pilipinas nga katugbang 4:15 sa kaadlawon/buntag sa UTC time zone (sama sa oras sa London o United Kingdom) human sa lapad nga service outage nga nakaapekto sa nagkalainlaing bahin sa kalibotan.
Matod sa kompanya, nahuman na ang ilang pag-ayo sa teknikal nga problema ug nabalik na ang serbisyo sa tanang apektadong kustomer ug rehiyon.
Lakip sa mga naapektuhan ang Outlook email, Microsoft Teams ug Copilot AI assistant tungod sa gitawag nilang “elevated load” sa ilang imprastraktura.
Miabot sa 74 ka nasud ang naangkon sa maong pagkaputol sa serbisyo, lakip ang Pilipinas, diin nalangan ang trabaho ug operasyon sa Information Technology, Business Process Outsourcing ug uban pang mga kompanya.
Giklaro usab sa Microsoft nga teknikal nga problema ang hinungdan sa outage ug dili cyberattack.
Samtang, gipahimangnoan sa kompanya ang mga tiggamit batok sa aktibong phishing campaign nga nagpahimulos sa maong insidente pinaagi sa peke nga mga email nga nagpakaaron-ingnon nga opisyal nga pahibalo gikan sa Microsoft.
Giawhag ang publiko nga dili mag-abli og kadudahang mga link o mosunod sa mga mando sa maong mga email aron malikayan ang pagpangawat sa ilang personal nga impormasyon.
