-- ADVERTISEMENT --

Nakakolekta na og kapin ₱900,000 nga halin ang mga micro, small and medium enterprises o MSMEs nga miapil sa Philippine Experience hub sulod sa ASEAN International Media Center (IMC) sa World Trade Center sa Pasay City.

Base sa datos sa Department of Tourism (DOT), nakuha ang maong kita sukad sa soft opening sa MSME hub niadtong Nobyembre 11, 2026.

Giorganisar sa DOT kauban ang Presidential Communications Office (PCO) ang Philippine Experience aron ipakita ug ipaila sa mga lokal ug langyaw nga bisita ang nagkadaiyang produkto sa Pilipinas, lakip ang mga pagkaon ug lokal nga produkto gikan sa Luzon, Visayas, ug Mindanao.

Sumala ni Tourism Secretary Dita Angara-Mathay, oportunidad ang pag-host sa Pilipinas sa ASEAN Summit aron mas mailhan sa tibuok kalibotan ang mga produkto sa nasud.

Dugang pa niya, subay kini sa mando ni President Ferdinand Marcos Jr. nga pahimuslan ang maong kalihokan aron mapasiugda ang mga lokal nga produkto ug negosyo sa Pilipinas.

-- ADVERTISEMENT --