Gipahibalo sa City Population Office of Davao nga nakaserbisyo na kini sa 19 ka mga kliyente sa libreng No-Scalpel Vasectomy (NSV) isip kabahin sa programa sa Lokal nga Kagamhanan sa Davao City alang sa bulan sa Agosto 2025.
Ang inisyatibo gihimo uban sa pakig-tambayayog sa DKT Philippines Foundation aron mapalapdan ang maong inisyatiba alang sa family planning ngadto sa mga magtiayon ug pamilya sa dakbayan.
Ang operasyon gilusad kaniadtong Agosto 8, 2025, diin gipahimuslan sa mga partisipante ang libre, luwas, ug non-invasive nga pamaagi sa pagpugong sa pagmabdos.
Ang NSV, nga usa ka minor surgical procedure alang sa mga lalaki, gipasabot sa mga health worker isip epektibo ug permanente nga pamaagi sa family planning, ug hinay-hinay na karon nga gidawat sa komunidad isip usa ka responsable nga lakang alang sa luwas nga pag practice sa family planning.
Matod pa sa City Population Office, nga padayon nilang ginasuportahan ang kampanya sa reproductive health ug gender equality pinaagi sa paghatag sa tanang sektor og patas nga serbisyo alang sa pagpugong sa pagmabdos.
Gilauman nga pinaagi sa susamang mga programa, mas daghan pang magpamilya ang makabaton og kahibalo ug kadasig nga gamiton ang family planning aron mapalambo ang kalidad sa kinabuhi sa komunidad.
