DAVAO CITY – Subling mihangyo karon ang City Health Office (CHO) sa mga ginikanan og kooperasyon dungan sa pagsugod karong adlawa sa ikaduhang hugna sa Sabayang Patak Kontra Polio nga matapos sa Disyembre 7, 2019.
Una ng gitambagan sa CHO ang mga ginikanan nga dili magduha-duha nga pabakunahan ang mga ilang mga anak gumikan kay dakong tabang kini aron malikayan sa mga bata ang polio virus.
Kahinumduman nga usa sa mga nahimong lakang karon sa ahensiya mao ang pagpahimutang og mga personahe sa mga entry points sa dakbayan aron masiguro nga mabakunahan ang mga bata atol sa second round.
Andam na sab karon ang mga kaabag sa CHO nga gilangkuban sa mga pribadong sektor ingon man sa mga personahe sa lokal nga panggamhanan aron nga mapadali ang ilang trabaho ug maangkon ang 110 percent nga target.
Nasayran kang CHO head Josephine Villafuerte nga motabang pa gihapon kanila ang mga grupo nga nahimong kabahin sa unang round sa bakuna ug gidungagan lamang nila karon ang ilang mga personahe.
