Mibutyag si Sen.Robin Padilla nga wala pa siya makadawat og summons kalabot sa imbestigasyon sa paggawas ni Sen.Ronald dela Rosa gikan sa Senado niadtong sayong kabuntagon sa Mayo 14.
Matod ni Padilla, naghulat pa siya nga maimbitahan aron mapasabot ang iyang bahin kalabot sa mga report nga kauban niya si Dela Rosa sa dihang migawas kini sa Senate premises.
Samtang, gikanayon usab ni NBI Dir. Atty. Melvin Matibag nga kinahanglan mopasabot si Padilla mahitungod sa iyang papel sa paggawas ni Dela Rosa gikan sa protective custody sa Senado taliwala sa arrest warrant nga gipagawas sa International Criminal Court batok sa senador. Matod ni Matibag, si Padilla kuno ang “katapusang kauban” ni Dela Rosa sa wala pa kini migawas sa Senado.
Sa lahi usab nga pahayag, gikanayon ni Padilla nga wala siya sa ikaduhang andana sa Senado sa dihang nahitabo ang pagpamusil niadtong gabii sa Mayo 13.
Dugang pa niya, nanaog lamang siya aron mangumusta sa ubang senador human niya madungog ang mga buto sa pusil sa wala pa siya mibalik kang Dela Rosa.
Matud pa, una nang napaabot sa balita nga wala na si Dela Rosa sa Senado ug migawas pasado alas-2:00 sa kadlawon niadtong Mayo 14.
Una nang giangkon ni Padilla sa usa ka interbyu nga iya ang sakyanang nakita sa CCTV footage nga migawas sa Senado, apan wala niini gikumpirma kon sakay ba didto si Dela Rosa.
