Nanawagan si Davao City Mayor Sebastian Z. Duterte sa mga lider sa gobyerno ug industriya nga palig-onon ang cross-border trade ug ablihan ang mas daghang investment opportunities alang sa mga komunidad sa Davao ug Borneo.
Gipahayag ni Mayor Duterte ang maong panawagan atol sa iyang pag-apil sa Davao-Borneo Growth Corridor Forum 2026 nga gipahigayon sa SMX Convention Center sa Davao City niadtong Septiyembre 18, 2026.
Gihatagan og higayon sa maong forum ang mga stakeholders gikan sa gobyerno, negosyo ug investment sector, lakip ang mga local ug international participants, nga hisgutan ang mga oportunidad alang sa mas lig-on nga economic cooperation tali sa Davao ug Borneo.
Dugang pa niini, gitutokan usab sa forum ang pagpalapad sa access ngadto sa regional ug global markets pinaagi sa mas lig-on nga trade, investment ug business partnerships.
Giawhag ni Mayor Duterte ang mga partisipante nga mosulod sa business-to-business o B2B ug business-to-government o B2G partnerships aron mapalambo ang mga oportunidad sa negosyo sa Davao City.
Gipasiugda usab niya ang potensyal sa Davao City isip usa sa mga lugar nga adunay daghang oportunidad alang sa mga investors ug negosyo.
Sumala pa ni Mayor Duterte, pinaagi sa mga partnership nga matukod tali sa Davao ug Borneo, mas mapadali ang socioeconomic development sa rehiyon ug mapalapad ang mga oportunidad alang sa mga komunidad.
Lakip sa iyang gipaabot ang usa ka shared future nga nagpunting sa prosperity, stability ug peace, dili lamang sulod sa Davao-Borneo Corridor ug East ASEAN Growth Area o EAGA, kundili hangtod sa ubang bahin sa kalibotan.
Sa pagkakaron, nahimong venue ang maong forum alang sa pagpalig-on sa relasyon tali sa mga stakeholders ug paghisgot sa mga posibleng partnership sa trade, investment ug regional connectivity.
