Gipatawag ni Executive Secretary Ralph Recto ang UPLIFT Committee aron palig-onon ang mga lakang sa gobyerno batok sa posibleng epekto sa nagkagrabeng tensiyon sa Middle East ug pagsaka sa presyo sa lana.
Gipasiugda ni Recto ang panginahanglan sa paspas nga paglihok aron mapanalipdan ang mga Filipino batok sa posibleng pagsaka sa pamasahe, presyo sa pagkaon ug uban pang mga palaliton.
Samtang, gipasaligan sa Department of Energy o DOE nga igo ang suplay sa gasolina, diesel ug LPG sa nasod, samtang padayon usab nga gimonitor sa gobyerno ang kahimtang sa suplay ug presyo sa petrolyo.
Gipadayon sa DSWD ang cash assistance ubos sa UPLIFT alang sa mga kwalipikadong kabus ug low-income households, lakip ang pag-andam sa dugang nga tabang kung mosamot ang epekto sa krisis.
Alang sa mga overseas Filipino workers nga naapektuhan sa kagubot sa Middle East, padayon usab ang repatriation assistance sa gobyerno.
Dugang pa, gipataas ngadto sa ₱12 kada litro ang fuel discount alang sa kwalipikadong transport workers, samtang nagpadayon ang ubang commuter assistance sama sa fare discounts ug Libreng Sakay.
Gihatagan usab og pagtagad sa gobyerno ang mga mag-uuma ug mananagat pinaagi sa financial ug fuel assistance, samtang giandam sa Department of Labor and Employment ang posibleng pagpalapad sa TUPAD emergency employment program alang sa mga sektor nga mahimong maapektuhan sa krisis.
