Nagpahimangno si Polish Prime Minister Donald Tusk sa posibleng pag-atake sa Russia gamit ang mga drone ug rocket batok sa mga nasod nga miyembro sa NATO nga nagsuporta sa Ukraine, lakip ang Poland.
Sumala ni Tusk, posible nga ipakita sa Russia nga aksidente lamang ang maong mga insidente aron malangan ang desisyon sa NATO sa pagresponde kung maigo ang teritoryo sa usa sa mga miyembrong nasod niini.
Gibutyag usab ni Tusk nga mas lisod matiktikan ang mga bag-ong matang sa jet-powered drones tungod kay mas paspas ug mas taas ang ilang paglupad. Matud niya, nakabase ang maong pasidaan sa intelligence nga nadawat sa Poland gikan sa NATO, Ukraine ug Estados Unidos.
Dugang pa niini, gipunting ni Tusk ang mga pag-atake sa mga border crossing nga giingong tumong sa pagputol o paglangan sa mga supply line padulong sa Ukraine.
Tungod niini, gikatakdang mobiyahe si Tusk ngadto sa Kyiv aron makig-atubang kang Ukrainian President Volodymyr Zelenskyy ug hisgutan ang mga lakang sa pagdepensa batok sa bag-ong mga drone, lakip ang dugang nga sanctions batok sa Russia.
Samtang, gipahibalo ni US President Donald Trump nga adunay pag-uswag sa plano sa pagtukod og permanenteng US Army base sa Poland, nga dugay nang gipangita sa Warsaw isip dugang nga seguridad sa nasod.
Sa pagkakaron, nagpadayon ang Poland ug mga kaalyado niini sa pagpalig-on sa ilang depensa tungod sa nagkadaghang hulga nga may kalabotan sa gubat tali sa Russia ug Ukraine.
