Nanawagan ang House prosecution og patas ug parehas nga pagpatuman sa sub judice rule sa tanang nalambigit sa impeachment trial, lakip si Vice President Sara Duterte.
Gipatin-aw ni prosecution counsel Atty. Benjamin Tolosa Jr. nga wala siya makalapas sa maong lagda, ug ang iyang mga pahayag sa media kay paghisgot lamang pag-usab sa mga testimonya nga nadungog atol sa impeachment proceedings.
Gibutyag usab ni Tolosa nga mas klaro kuno ang paglapas sa sub judice rule sa mga pampublikong pahayag ni VP Sara, nga iyang giingong nagpunting batok sa Impeachment Court ug sa mga senator-judge.
Lakip sa iyang gipunting ang pahayag ni VP Sara nga kontrolado kuno ni Pangulong Ferdinand Marcos Jr. ang mga senador, hukom ug piskal.
Sumala sa prosecution, mahimong makaapekto kini sa pagsalig sa publiko sa mahimong desisyon sa mga senator-judge.
Gipatin-aw ni Tolosa nga wala sila nangayo og espesyal nga pagtratar, kondili patas ug parehas lamang nga pagpatuman sa mga lagda ngadto sa tanang partido nga nalambigit sa impeachment proceedings.
Matud pa niya, usa lamang ang lagda nga nagdumala sa mga proseso ug kinahanglan kini ipatuman sa parehas nga paagi ngadto sa tanang tawo nga sakop niini.
Dugang pa ni Tolosa, kung dili patas ang pagpatuman sa mga lagda, mahimong maapektuhan ang pagsalig sa tribunal, apan kung parehas kini nga ipatuman sa tanan, mas mapalig-on ang institusyon.
