DAVAO CITY – Gibutyag sa hepe sa Buhangin Police Station, PMaj. Joenel Pederio nga Cerebral Hemorrhage ang rason sa kamatayon sa 29 anyos nga katabang kinsa gipatay sa iyang 70 anyos nga amo.
Kabahin niini, napasaka na sa kapulisan ang kasong murder diin gikonsiderang person of interest usab sa maong krimen ang anak sa suspek nga si Catherine Pagatpatan kinsa parehong mga residente sa Blk 9, Lot 6, Deca Homes, Cabantian, Buhangin Davao City.
Kahinumdumang nagkaguliyang ang mga residente sa maong area, niadtong Hunyo 18 sa buntag dihang nakaplagan ang patay’ng lawas sa usa ka babaye nga gitabunan og trapal kilid sa dalan. Sa CCTV footage, kadlawon niadtong adlawa nakita ang suspek nga si Nenita nga nagguyod sa trolley nga maong gikargahan sa patay’ng lawas sa biktima. Mikabat sa 20 metros ang gilay-on sa giguyoran sa suspek sa patay’ng lawas sa biktima una kini gibilin sa kilid sa kalsada. Aminado si PMaj. Pederio nga naglisud sila sa pag interrogate sa suspek sanglit duna matod pa kini gihambin nga balatian, nagausab-usab ang pamahayag niini ug dili buot niini nga mabugtuan gilayon kini sa kinabuhi samtang gipalagman pa ang imbestigasyon.
Giklaro sa opisyal nga bisan og napasaka na ang kaso apan dili pa gihapon makonsiderang case close ang maong krimen. Busa hangyo sa opisyal ngadto sa publiko ang pagsalig nga mahatod ang tinuod nga hustisya ngadto sa biktima.
Gitagaan usab og pagtagad ni Pederio ang mga pipila ka mga tumo-tumo sa katawhan nga ginatagaan matud pa og “special treatment” ang suspek diin sumala pa gikinahanglan nila buhaton ang maong lakang nga di una isulod sa selda ang suspek tungod sa gibati niini.
