Miabot na sa kapin 100 ang namatay ug sobra 390 ang gidudahang adunay kaso sa Ebola sa Democratic Republic of the Congo, sumala sa Africa Centres for Disease Control and Prevention.
Samtang natala usab ang virus sa Uganda diin adunay duha ka kumpirmadong kaso ug usa namatay.
Lakip sa mga kumpirmadong natakdan ang usa ka Amerikanong doktor sa DRC nga ipaagi sa Germany alang sa hustong pagtambal.
Gipahibalo usab nga adunay pipila ka mga Amerikano nga posibleng na-expose sa virus ug karon gitabangan sa gobyerno sa United States.
Una nang gideklara sa World Health Organization ang outbreak isip public health emergency of international concern apan layo pa nga mahimong pandemya.
Bisan paman niini, gipahimangnoan ang publiko nga hugot nga sundon ang mga patakaran ilabi na sa paglubong sa mga nakabsan tungod sa taas nga risgo sa pagkaylap sa virus.
Nagpatuman na usab og border screening ang silingang mga nasod sama sa Rwanda ug Nigeria isip lakang aron malikayan ang pagkaylap sa virus.
Matod sa Centers for Disease Control and Prevention, ubos pa ang risgo niini sa Amerika apan ilang ginabantayan ang mga biyahero gikan sa apektadong lugar nga mosulod sa U.S.
Dugang pa usab niini, nagpagawas na usab ang Estados Unidos og Level 4 travel advisory, ang labing taas nga pahimangno batok sa pagbiyahe paingon sa DRC.
Sa pagkakaron, wala pay aprubadong tambal o bakuna batok sa Bundibugyo strain sa Ebola, maong nanawagan ang Africa CDC ug WHO sa publiko nga sundon ang mga health protocol ug palig-onon ang surveillance sa komunidad aron mapugngan ang pagkaylap sa virus.
