Duha ka tawo ang namatay samtang usa ang naospital human sa usa ka pagpamusil nga nahitabo sa Buaya Road, duol sa New City Hall sa Barangay Magugpo East, Tagum City, niadtong Miyerkules sa hapon, Mayo 20, 2026.
Base sa report sa Tagum PNP, ang mga namatay giila nga sila si Ronnie Tapang, 27 anyos, ug usa ka babaye nga gitawag og alyas “Analyn,” 33 anyos. Samtang ang laing biktima nga si Ronel Tapang, 33 anyos, gidala sa rescue team ngadto sa ospital aron matambalan.
Matod ni Tagum PNP OIC COP PLtCol. Edgardo Bahan, usa sa mga biktima adunay kalambigitan sa kasong kawat ug bag-o lamang nakapyansa.Sa inisyal nga imbestigasyon, nasayran nga nagsakay ang mga biktima sa usa ka traysikol sa dihang pag-abot nila sa Buaya Road kalit silang gipamusil sa wala pa mailhing mga suspek.
Narekober sa mga otoridad sa crime scene ang mga basiyo sa bala sa kalibre .45 nga pistola. Tungod sa grabeng mga samad pinusilan nga naangkon sa duha ka biktima, namatay sila dayon sa lugar.Padayon pa sa gihapon ang imbestigasyon sa Tagum PNP aron mailhan ug madakpan ang mga responsable sa maong insidente.
