Nangayo og pagtugot ang defense team ni Vice President Sara Duterte sa Senate Impeachment Court nga makapresentar gihapon og rebuttal evidence aron matubag ang mga ebidensiyang nauna nang gipresentar sa prosecution kalabot sa tulo ka artikulo sa impeachment nga gi-withdraw niini.
Sumala kang Atty. Michael Wesley T. Poa, tigpamaba sa defense team, wala nila supaka ang desisyon sa prosecution nga i-withdraw ang Articles I, III ug IV. Ang ilang gikabalak-an mao kon hatagan pa ba sila og higayon nga makapresentar og mga testigo nga motubag sa mga ebidensiyang gilatid na, ilabina sa mga isyu sa confidential funds ug grave threats.
Gipunting ni Poa nga importante nga madungog sa publiko ang duha ka panig aron mas masabtan ang mga alegasyon. Pinaagi niini, matubag usab sa ilang mga testigo ang mga isyung nahisgutan sa prosecution sa wala pa gibawi ang maong mga artikulo.
Gikumpara usab ni Poa ang sitwasyon sa impeachment trial ni kanhing Chief Justice Renato Corona, diin matud niya, wala pa makapresentar og ebidensiya ang prosecution sa mga artikulong ilang gi-withdraw. Lahi kini sa kasamtangang kaso ni Duterte, diin nakapresentar na og testimonya ang prosecution kalabot sa pipila ka alegasyon sa wala pa ang ilang desisyon nga i-withdraw ang maong mga artikulo.
Sa pagkakaron, nagpaabot pa ang depensa sa desisyon sa Senate Impeachment Court kung tugotan ba silang makapresentar og dugang nga ebidensiya ug mga testigo aron matubag ang mga alegasyon nga nahisgutan sa tulo ka gi-withdraw nga impeachment articles.
