Gikuwestiyon ni Davao City 3rd District Representative Omar Vincent Duterte ang pag-atras sa House prosecution panel sa tulo sa upat ka articles of impeachment batok kang Vice President Sara Duterte, human sa 38 ka adlaw nga pagpresentar og mga saksi ug dokumento sa Senate Impeachment Court.
Gipunting sa kongresista nga ang mga alegasyon kalabot sa confidential funds, bribery ug grave threats gipresentar sa publiko pinaagi sa mga hearing nga gisibya ug nahimong sentro sa mga balita, apan wala na ipadayon sa prosecution ang maong tulo ka artikulo.
Alang kang Omar, dili makatarunganon nga ipresentar ang ebidensya batok sa usa ka opisyal, maapektuhan ang iyang reputasyon, ug moatras sa panahon nga ang depensa na unta ang motubag sa mga alegasyon.
Gipasiugda usab niya ang posisyon ni defense lead counsel Atty. Sheila Sison nga ang pag-atras sa mga artikulo sa maong yugto mahimong adunay mga kinaiya sa mistrial. Gisaway usab sa depensa ang ideya nga sa ubang plataporma na lamang tubagon ang mga alegasyon imbes nga sulod sa impeachment court.
Matud ni Omar, naggamit ang proseso sa impeachment og oras ug pondo sa publiko, busa ang depensa angay usab nga hatagan og higayon sa pagpresentar sa ilang ebidensya ug pagtubag sa mga alegasyon sa samang korte.
Nanawagan ang kongresista sa Senate Impeachment Court nga tugotan si Duterte nga hingpit nga makatubag sa mga alegasyon ug mapanalipdan ang iyang katungod sa due process samtang nagpadayon ang impeachment proceedings.
