Gipalig-on sa Davao City Police Office (DCPO) ang koordinasyon sa mga opisyal sa eskwelahan sa Toril District aron masiguro ang kaluwasan sa mga estudyante, magtutudlo ug ubang kawani atol sa klase.
Mibisita ug nakigtagbo si DCPO City Director PCOL Peter Bauzon Madria sa mga opisyal sa duha ka eskwelahan aron hisgotan ang mga insidente nga may kalabotan sa seguridad ug ang angay nga mga lakang aron mapanalipdan ang mga nag-eskwela.
Lakip sa iyang gitagbo si Dr. Ruben L. Dela Cruz, presidente sa Davao Central College, ug si Fortunato Radin, assistant to the principal sa San Miguel Integrated School sa Lubogan, Toril, Davao City.
Nahimong higayon ang mga tigom aron hisgotan ang angay nga aksyon sa mga isyu sa seguridad ug palig-onon ang pagtinabangay tali sa kapulisan ug sa administrasyon sa mga eskwelahan.
Gipunting usab sa DCPO ang kahinungdanon sa epektibong koordinasyon sa mga school officials aron mapadayon ang luwas nga palibot sa pagkat-on ug malikayan ang mga posibleng hulga sa seguridad.
Kabahin kini sa paningkamot sa DCPO nga mapalambo ang relasyon sa mga institusyong pang-edukasyon ug masiguro nga adunay tukmang pagtubag sa mga isyu nga mahimong makaapekto sa kaluwasan sa mga estudyante ug kawani.
Padayon ang pakigtambayayong sa kapulisan ug mga eskwelahan aron mapalig-on ang mga pamaagi sa seguridad sulod ug palibot sa mga kampus.
