Nagpatuman ang Bangko Sentral ng Pilipinas (BSP) og bag-ong pamaagi sa pagkuwenta sa kapital nga kinahanglan itagana sa mga bangko aron matabonan ang posibleng operational losses ug mapahiuyon ang lokal nga mga lagda sa internasyonal nga standards.
Ubos sa Circular No. 1241 nga gipetsahan Oktubre 9, gisagop sa BSP ang Basel III New Standardized Approach (NSA), nga mopuli sa Basic Indicator Approach ug Standardized Approach sa pagkuwenta sa kapital alang sa operational risks.
Sakop sa bag-ong lagda ang universal, commercial ug digital banks, lakip ang ilang subsidiary banks ug quasi-banks.
Ang operational risk naglakip sa posibleng kapildihan tungod sa kapakyasan sa internal processes, sayop sa tawo, problema sa sistema, cyberattacks, fraud ug natural disasters.
Mas gikonsiderar sa NSA ang kita sa bangko ug ang kasaysayan sa operational losses aron matino ang gikinahanglang kapital. Gilauman usab nga mapalig-on niini ang risk management systems ug pagtipig sa rekord sa nangaging mga kapildihan.
Atol sa monitoring period, kinahanglan magpasa ang mga bangko og capital adequacy ratio reports gamit ang bag-o ug daang pamaagi. Magpabilin una ang daang pamaagi isip basihan sa pagsusi sa ilang pagsunod sa minimum capital requirements.
Sugdan ang hingpit nga implementasyon sa NSA sa reporting period nga matapos sa Disyembre 2027. Ang mga bangkong andam na mahimong mosagop niini sa mas sayong panahon, basta pahibaw-on ang BSP ug moagi sa verification.
