Gisugdan na sa Department of Justice ang preliminary investigation sa kasong obstruction of justice batok kang Senador Robin Padilla ug uban pa, sumala sa tigpamaba sa departamento nga si Atty. Polo Martinez.
Ang sunod nga hearing sa maong kaso gikatakda sa Nobyembre 6, 2026.
Kahinumdoman nga gisang-at sa Philippine National Police-Criminal Investigation and Detection Group kaniadtong Mayo 28, 2026 ang reklamo batok kang Padilla ug sa ubang nalambigit kalabot sa paggawas ni Senador Ronald “Bato” Dela Rosa sa Senado.
Misulod si Dela Rosa sa Senado niadtong Mayo 11 human misulay ang mga awtoridad sa pagserbisyo sa arrest warrant nga giisyu sa International Criminal Court batok kaniya. Apan, nakagawas siya sa maong building kaniadtong Mayo 14, human sa kaguliyang nga nahitabo sa Senate premises.
Nag-atubang si Dela Rosa sa arrest warrant sa ICC kalabot sa giingong responsibilidad niini sa mga crimes against humanity nga nalambigit sa mga pagpatay atol sa kampanya batok sa ilegal nga droga panahon sa administrasyon ni kanhi Pangulong Rodrigo Duterte.
Una nang gilimod ni Padilla nga gitabangan niya si Dela Rosa sa pag-ikyas. Matod sa senador, nakisabay lamang si Dela Rosa sa iyang sakyanan sa paggawas sa Senado.
Sa pagkakaron, preliminary investigation pa lamang ang gihimo sa DOJ aron matino kung adunay igong basihan ang reklamo alang sa sunod nga proseso sa kaso.
