Gisumite na ni Department of Health (DOH) Secretary Ted Herbosa ang iyang sulat sa pagbiya sa katungdanan ngadto kang Pangulong Ferdinand Marcos Jr., sumala sa kopya sa resignation letter nga migawas karong Lunes, Hulyo 13.
Sumala pa sa iyang sulat, mipadayag si Herbosa nga human sa iyang operasyon sa tuhod, nasabtan niya nga ang pag-atiman sa iyang kaugalingong panglawas maoy kinahanglan unahon. Tungod niini, nakahukom siyang mobiya sa iyang katungdanan aron matutokan ang iyang hingpit nga pagkaayo.
Dugang pa niini, giingon ni Herbosa nga moagi siya og rehabilitasyon sulod sa tulo hangtod upat ka bulan aron hingpit nga makabawi sa iyang kahimtang.
Lakip sa iyang mensahe ang pagpangayo og pasaylo sa publiko ug sa iyang mga kauban kon adunay mga kakulangan o napakyasan siya atol sa iyang pagpangulo sa Department of Health (DOH).
Kahinumduman, gikumpirma kaniadto sa DOH nga naka-sick leave si Herbosa sukad Hulyo 6 human sa malampusong operasyon sa iyang tuhod, ug sa pagkakaron nagpailalom siya sa pisikal nga terapiya ug rehabilitasyon.
Sa pagkakaron, wala pa’y opisyal nga kumpirmasyon gikan sa Malacañang kabahin sa iyang pagbiya sa katungdanan, samtang si Usec. Albert Domingo ang nag-alagad isip temporaryong tigpangulo sa DOH.
