Giklaro sa Supreme Court nga adunay gahum si Pangulong Ferdinand Marcos Jr. sa pagtudlo sa sunod nga Chief Justice sa Korte Suprema.
Matud ni Supreme Court Spokesperson Atty. Camille Sue Mae Ting, ang Presidente mopili sa Chief Justice gikan sa listahan sa mga nominado nga giandam sa Judicial and Bar Council o JBC.
Subay sa Article VIII, Sections 4 ug 9 sa Konstitusyon, kinahanglan mapun-an sulod sa 90 ka adlaw ang bakanteng posisyon sa Supreme Court.
Base sa naandan nga proseso sa JBC, lima ka labing senior nga Associate Justices sa Korte Suprema ang giimbitar nga mosumiter og aplikasyon isip mga preferred candidates alang sa posisyon.
Gikatakda usab nga moretiro sa Nobyembre 6, 2026 si Chief Justice Alexander Gesmundo sa edad nga 70.
Sa iyang pagretiro, si Senior Associate Justice Marvic MVF Leonen ang mahimong Acting Chief Justice, subay sa Section 12 sa Republic Act No. 296 o Judiciary Act of 1948.
Ang maong probisyon nag-ingon nga kung mabakante ang posisyon sa Chief Justice, ang labing senior nga Associate Justice maoy mogunit sa mga katungdanan ug gahum sa Chief Justice hangtod nga adunay bag-ong Chief Justice nga matudlo ug mahimong kuwalipikado sa posisyon.
