Gitouhan ni kanhing Senate Pres.Koko Pimentel nga posibleng nabalaka si Sen. Pres. Alan Peter Cayetano nga mapatalsik o mapulihan sa iyang posisyon isip Senate President, maong makaduha na kining wala motunga sa sesyon sa Senado.
Sumala pa ni Pimentel, wala siyay laing nakita nga hinungdan nganong wala gihapon motambong si Cayetano sa sesyon sa Mataas nga Kapulungan gawas sa posibilidad nga nabalaka kini nga adunay mosukod sa iyang liderato. Dugang pa niini, giingon ni Pimentel nga posibleng adunay pipila ka mga miyembro sa majority bloc nga nakahukom na o nakigpulong na sa minority bloc aron ibalhin ang ilang suporta, maong nahimong usa sa posibleng rason sa wala pagtambong ni Cayetano sa sesyon.
Sa pagkakaron, parehas na ang ihap sa majority ug minority blocs nga adunay 11 ka miyembro matag usa human mikunhod usab ang ihap sa mayorya tungod sa pagtago ni Sen. Ronald dela Rosa, samtang anaa sa kustodiya sa Sandiganbayan si Jinggoy Estrada kalabot sa iyang kasong plunder.Bisan pa niini, gipatin-aw ni Pimentel nga gikinahanglan gihapon ang labing menos 13 ka boto gikan sa mga senador aron makapili ug bag-ong Senate President.
Lakip sa iyang gipahayag nga tungod sa lihok ni Cayetano ug sa ubang miyembro sa majority bloc, daw sila pa ang naglihok sama sa minority bloc, ilabina nga wala sila makapahigayon og sesyon sulod na sa duha ka adlaw bisan pa sa ilang gihuptang mayorya sa Senado. Matud pa niya, katingad-an nga dili makapadayon ang sesyon bisan pa nga anaa sa ilang kampo ang igong numero sa mga senador.
