Andam ang Iran sa bisan unsang senaryo kung mapakyas ang giplanong kasabutan uban sa Estados Unidos, samtang nagpadayon ang pagsusi sa Tehran sa tubag sa Washington bahin sa “7-Day Plan.”
Sumala kang Iranian Foreign Minister Abbas Araghchi, nadawat na sa Iran ang feedback sa Estados Unidos pinaagi sa mga Qatari mediator ug anaa na kini sa ilang internal review. Gipaabot nga ipahibalo sa Tehran ang ilang posisyon sa mga mosunod nga adlaw.
Ang 7-Day Plan usa ka roadmap nga gisugyot sa Iran aron makapahupay sa tensyon tali sa duha ka nasod. Lakip sa tumong niini ang pagpasig-uli sa normal nga pagbiyahe sa Strait of Hormuz sulod sa pito ka adlaw, paghunong sa mga pag-atake ug pagpadayon sa mas lapad nga negosasyon tali sa Washington ug Tehran.
Apan adunay mga kondisyon nga gipangayo sa Iran isip kabahin sa maong plano, lakip ang pagtangtang sa US naval blockade sa mga pantalan niini, paghatag og waiver alang sa oil sanctions ug pag-access pag-usab sa pipila ka frozen assets. Ang pag-abli sa Strait of Hormuz magdepende sa pagtuman sa mga kondisyon nga gilatid sa plano.
Samtang, ang administrasyon ni US President Donald Trump una nang misalikway sa unang bersyon sa proposal, apan mipadala gihapon og feedback pinaagi sa Qatar. Sa pinakabag-o nga negosasyon, ang usa sa dagkong isyu mao ang unsa nga lakang ang unang ipatuman ug unsa ang mosunod, imbes nga ang mismong mga elemento sa plano.
Importante ang Strait of Hormuz tungod kay usa kini sa labing estratehikong agianan sa lana sa kalibotan. Ang dugay nga pagsira o pagkabalda sa pagbiyahe sa maong katubigan mahimong makaapekto sa suplay sa enerhiya ug presyo sa lana sa internasyonal nga merkado.
Sa pagkakaron, padayon ang diplomatic efforts pinaagi sa Qatar aron mapaduol ang posisyon sa duha ka nasod.
Bisan pa sa negosasyon, gipasiugda sa Iran nga andam kini sa bisan unsang mahitabo kung mapakyas ang peace deal, samtang nagpabilin nga abli ang posibilidad sa diplomatikong solusyon.
