Napakyas sa target sa gobyerno ang tax collections sa unang unom ka bulan sa 2026, diin nagkulang og ₱16.6 bilyon ang nakolekta kumpara sa gitakdang programa alang sa unang semestre.
Base sa latest midyear report sa Development Budget Coordination Committee, misaka og 5.4% ang tax revenues ngadto sa ₱2.14 trilyon gikan sa ₱2.03 trilyon sa samang panahon niaging tuig.
Apan ubos gihapon kini sa ₱2.16-trilyon nga target sa gobyerno alang sa unang semestre.
Dako sa maong kakulang ang gikan sa Bureau of Internal Revenue, nga nakolekta og ₱1.65 trilyon, apan nagkulang kini og ₱22.6 bilyon sa ilang target.
Sumala sa DBCC, nakaapekto sa koleksyon ang paghinay sa infrastructure spending ug konsumo sa mga Pilipino tungod sa epekto sa oil-price shock.
Hinay usab ang pagtubo sa pipila ka dagkong revenue sources. Ang net income ug profit-related tax collections misaka lamang og 6.3% ngadto sa ₱901.7 bilyon, mas ubos kumpara sa 13.3% nga pagtubo sa 2025.
Misaka usab og 6.5% ang value-added tax collections ngadto sa ₱360.7 bilyon, apan mas hinay kini kumpara sa 15% pagtubo sa nakalabayng tuig.
Samtang, mikunhod og 4.3% ang excise tax collections ngadto sa ₱156.1 bilyon, sukwahi sa 16.3% pagtubo.
Mikunhod usab ang collections gikan sa buhis sa bank deposits ug percentage taxes sa mga bangko ug financial institutions, samtang miubos usab ang documentary stamp tax collections.
Sa laing bahin, nalapas sa target sa Bureau of Customs ang ilang koleksyon og ₱7 bilyon, human makakolekta og ₱491.9 bilyon batok sa ₱484.8-bilyong target.
Matud sa DBCC, gitabangan sa mas huyang nga piso ug mas taas nga presyo sa lana sa kalibotan ang customs collections, tungod kay misaka ang peso value sa mga imported goods ug ang kauban niini nga import-related taxes.
Padayon ang pagmonitor sa gobyerno sa performance sa mga nag-unang revenue agencies samtang gitinguha nga maabot ang tibuok-tuig nga tax collection targets sa 2026.
