Gipasalig sa Iran sa Pilipinas nga luwas nga makalabay ang mga barkong nagdala og bandera sa Pilipinas, lakip na ang tanang Filipino seafarers sa Strait of Hormuz, sumala sa Department of Foreign Affairs (DFA) kagahapong adlawa, Abril 2, 2026.
Apektado ang maong agi-anan tungod sa padayon nga gubat sa Middle East nga nakaapekto sa global nga suplay sa lana.
Sumala sa DFA, nahitabo ang kasabutan human sa phone conversation tali ni Foreign Affairs Secretary Ma. Theresa P. Lazaro ug Iranian Foreign Minister Seyed Abbas Aragchi.
Gipahayag sa DFA nga gisiguro sa Iran nga tugotan ang luwas, walay babag, ug paspas nga pag-agi sa mga barko sa Pilipinas sa maong agi-anan.
Kini misunod sa hangyo sa Pilipinas nga ilhon isip “non-hostile country” aron masiguro ang luwas nga pag-agi sa Strait of Hormuz, nga nagdala og 20% sa global nga suplay sa lana ug liquefied natural gas sa tibuok kalibutan.
Dugang pa sa DFA, importante kini nga lakang aron maprotektahan ang mga seafarers ug masiguro ang seguridad sa enerhiya sa nasud, ilabi na nga misaka ang presyo sa lana nga nakapahimo sa Pilipinas nga magdeklara og state of national energy emergency.
Sumala ni Palace Press Officer Claire Castro, mainiton ug abri ang nahitabo nga pagpakig-istorya tali sa duha ka partido.
Lakip usab sa nahimong pulong si Energy Secretary Sharon Garin ug Iranian Ambassador Yousef Esmaeilzadeh.
Nagkasabot ang duha ka nasud nga iproseso ang tanang hangyo sa gobyerno pinaagi sa opisyal nga diplomatic channels aron mas mapaspasan ang pagresponde niini.
