Gipangutana ni International Criminal Court o ICC Trial Chamber III Judge Joanna Korner ang depensa ni kanhi Pangulong Rodrigo Duterte tungod sa giingong pagdumili niini nga makigtambayayong sa prosekusyon aron mapakunhod ang gidaghanon sa mga dokumentong gamiton sa husay sa kasong crimes against humanity.
Atol sa ika-upat nga status conference kagahapong adlawa, Oktubre 14, 2026, gisugyot ni Senior Trial Lawyer Julian Nicholls sa prosekusyon nga magkasabot ang duha ka kampo sa gidaghanon sa mga opisyal nga rekord, nga mahimong makatangtang sa 42,511 ka dokumento ug makapakunhod sa pormal nga listahan sa ebidensiya og 6,863 ka item.
Lakip sa mga gisugyot ang pagkuha og independent expert ug paghatag sa depensa og higayon nga susihon ang pamaagi sa pag-ihap ug pagklasipikar sa mga dokumento. Apan, sumala kang Nicholls, gisalikway matud pa sa depensa ang maong mga sugyot.
Gipunting ni Judge Korner ngadto kang Lead Defense Counsel Peter Haynes nga daw gihimo na sa prosekusyon ang tanang paagi aron makatabang, apan wala kini dawata sa depensa.
Sa iyang bahin, nangatarongan si Haynes nga lima na ka tuig nga anaa sa prosekusyon ang mga dokumento, apan wala pa kini igo nga masusi sa mga analyst o abogado. Matud pa niya, kapin 35,000 ka pages ang kinahanglang tun-an, nga posibleng manginahanglan og dedikadong grupo sulod sa kapin usa ka tuig.
Misupak si Nicholls sa alegasyong nagsalig lamang ang prosekusyon sa Artificial Intelligence imbes sa pagsusi sa tawo. Matud pa niya, pila na ka bulan nga mano-manong gisusi sa mga analyst ang mga dokumento aron mabulag ang mga rekord sa aktuwal nga operasyon sa kapulisan gikan sa mga kasong walay kalabotan niini.
Samtang, mipadayag si Haynes nga kinahanglan nga makasusi nga gawasnon ang iyang grupo sa mga dokumento aron matino kung unsang mga panghitabo ang mapamatud-an pinaagi sa opisyal nga ebidensiya.
Pagpaklaro ni Judge Korner nga ang gisugyot nga proseso sa prosekusyon gituyo aron makatabang sa depensa ug wala siya makakita og paglapas sa katungdanan sa mga abogado sa maong panukala.
Bisan pa sa maong pagsaway, ang panaglalis may kalabotan sa pagdumala ug pagsusi sa mga dokumento sa kaso, ug dili kini desisyon sa pagkasad-an o pagka-inosente ni Duterte.
