Gikumpirma ni INC Spokesperson Edwil Zabala nga ilaha na nga gitapos kagahapong adlawa ang rally nga unta molungtad pa hangtod karon.
Pagpasabot ni Ka Edwil nga gikapoy na matud pa ang mga mitambong sa protesta.
Dugang pa ni Zabala, dili na kinahanglan ang tulo ka adlaw aron makab-ot ang tumong nga mapaabot ang mensahe sa ilang panawagan alang sa kamatuoran, hustisya, pagpatubag, ug kalinaw.
Una nang gikatakda nga matapos ang tulo ka adlaw nga rally karong adlawa.
Pasado alas 8 kagabii, gibutyag sa Manila Disaster Risk Reduction and Management Office nga ang crowd estimate sa Luneta miabot sa 550,000 ka mga tawo.
Apan una paman niini, si Interior Secretary Jonvic Remulla mibutyag nga ang unang adlaw sa tulo ka adlaw untang protesta ang kasagaran nga malinawon, apan iyang gipasalig nga andam ang gobyerno sa pag-atubang sa mga gustong magpahungaw sa gibati gamit ang bug-os nga gahum sa balaod. Anaa sa 110,000 sumala pa ang nagkampo didto sa lugar pagkagabii alang sa ikaduhang adlaw sa protesta niadtong Lunes, sumala sa Manila Police District.
Gibutyag sa INC general evangelist Bienvenido Santiago Jr. nga ang tulo ka adlaw nga protesta sa INC nagtumong sa panawagan sa klaro ug konkreto nga aksyon batok sa korapsyon sa flood control projects, ug dili aron ipahagsa ang gobyerno.
