Gitugotan sa Regional Trial Court (RTC) Branch 27 sa Lapu-Lapu City, Cebu ang kontrobersyal nga contractor nga si Sarah Discaya nga makapiyansa og P1 milyon kalabot sa kasong malversation of public funds ug paglapas sa Anti-Graft and Corrupt Practices Act, nga may kalabotan sa giingong ghost project sa Davao Occidental.
Gitugotan usab sa korte ang finance officer sa Department of Public Works and Highways (DPWH) sa Davao Occidental nga si Czar Ryan Ubungen nga makapiyansa og P300,000.
Sumala kang Judge Nelson Leyco sa RTC Branch 27, wala pa igo ang mga ebidensyang gipresentar sa prosekusyon aron magpabilin sa prisohan ang duha samtang nagpadayon ang pagdungog sa kaso.
Matod sa korte, wala pay testigo nga nakapamatuod sa giingong papel ni Discaya sa alegadong anomalya sa proyekto. Wala usab sa pagkakaron mapamatud-i nga siya ang naghimo sa mga peke nga dokumento o nakigsabwatan sa ubang mga akusado.
Samtang, wala gitugoti sa korte ang hangyo sa walo pa ka ubang akusado nga makapiyansa, lakip ang pipila ka mga opisyal sa DPWH ug usa ka opisyal sa St. Timothy Construction.
Sumala sa korte, mas lig-on ang mga ebidensya batok kanila, ilabina sa giingong mga peke nga dokumento nga sila mismo ang mipirma.
Gipasabot usab sa korte nga ang paghatag og piyansa wala magpasabot nga wala nay tulubagon ang akusado. Hinunoa, kini usa lamang ka pag-ila sa katungod sa akusado nga makagawas sa prisohan sa makadiyot samtang ginadungog pa ang kaso.
Sa laing bahin, ang pagdumili sa korte sa hangyo nga makapiyansa ang usa ka akusado wala usab magpasabot nga napamatud-an na ang iyang sala.
Si Sarah Discaya nag-atubang usab og lahi nga kaso nga may kalabotan sa giingong P53.9 milyong ghost project sa Calumpit, Bulacan.
