Gidasig sa Bank of the Philippine Islands (BPI) ang Bangko Sentral ng Pilipinas (BSP) nga dili una mohunong sa pagpataas sa interest rates bisan pa sa hinay nga pagtubo sa ekonomiya sa nasud.
Matod ni Emilio Neri Jr., lead economist sa BPI, posibleng mosamot ang inflation ug mas moubos ang purchasing powersa mga panimalay kung sayong undangon ang pagpahugot sa monetary policy.
Mas angay, sumala ni Neri, ang hinay-hinay ug tukmang pagpataas sa interest rates aron mapugngan ang pagsaka sa presyo, samtang kinahanglan usab molihok ang ubang ahensya sa gobyerno aron masulbad ang mga problema sa suplay sa mga batakang produkto.
Ang pasidaan gisunod sa 2.1% GDP growth sa Pilipinas sa ikatulong quarter, ang pinakahinay sulod sa kapin 16 ka tuig gawas sa panahon sa COVID-19 pandemic.
Sa pagkakaron, gipaabot sa BSP nga moabot sa 6.1% ang average inflation karong tuiga, layo sa tulo ka porsyentong target niini.
Mikabat na sa 1.25 percentage points ang total nga pagpataas sa BSP sa policy rate sukad Abril, nga nagdala sa overnight borrowing rate ngadto sa 5.5 porsyento.
Samtang, gipasiugda ni BSP Governor Eli Remolona Jr. nga andam ang central bank nga mopataas pa sa interest rates kutob sa gikinahanglan aron makontrol ang inflation.











