Gihatagan og direktiba ni Philippine National Police (PNP) Chief Police General Jose Melencio Nartatez Jr. ang pagpalig-on sa presensya sa mga pulis ug pag-andam sa mga personnel ug kagamitan alang sa pagtubag sa epekto sa Bagyong Inday sa pipila ka bahin sa nasod.
Bisan wala kini direktang mitugpa sa yuta, nakapahinabo ang bagyo og pagkahugno sa yuta ug pagbaha sa pipila ka lugar, ilabina sa Visayas ug Mindanao, nga miresulta sa pagkamatay sa 18 ka tawo samtang 14 pa ang nawala.
Matud ni Nartatez, padayon nga aktibo ang PNP sa search and rescue operations, clearing operations, pag-apod-apod og ayuda, ug uban pang mga lakang alang sa mga naapektuhan sa kalamidad.
Una nang gipailalom sa heightened alert status ang mga police unit sa tibuok nasod aron dali nga makatubag sa mga panginahanglan sa katawhan.
