Gipirmahan ni Presidente Ferdinand Marcos Jr. ang Executive Order No. 131 kaniadtong Nobyembre 12,2026 aron ipatuman ang AI Governance Framework ug tukoron ang National Artificial Intelligence Council (NAIC) nga magdumala sa responsable nga paggamit sa Artificial Intelligence o AI sa Pilipinas.
Sumala kang Palace Press Officer Undersecretary Claire Castro, giila sa maong mando ang AI isip usa ka himan nga makatabang sa pagpasayon sa kinabuhi sa mga Pilipino, ilabina sa mga mamumuo, negosyo, ug komunidad.
Tumong sa maong executive order nga masiguro ang luwas, responsable ug etikal nga paggamit sa AI, lakip ang paghatag og igong proteksyon aron mapadayon ang pagsalig sa publiko.
Ubos sa mando, gitasahan ang NAIC sa pagkoordinar, pagpalambo ug pagmonitor sa pagpatuman sa AI Governance Framework, lakip ang paghimo og mga polisiya, regulasyon, pagpalig-on sa mga institusyon ug pagpalambo sa kapasidad sa nasud sa paggamit sa teknolohiya.
Pangulohan kini sa Executive Secretary sa konseho isip Chairperson, samtang ang Secretary sa Department of Economy, Planning, and Development ang mahimong Vice Chairperson.
Lakip sa mga miyembro ang mga kalihim sa Department of Information and Communications Technology, Department of Science and Technology, Department of Trade and Industry, Department of Education, Department of Labor and Employment ug Department of Budget and Management.
Apil usab ang Commission on Higher Education, Technical Education and Skills Development Authority ug usa ka representante gikan sa pribadong sektor.
