-- ADVERTISEMENT --

Nanawagan si Sen. Francis “Kiko” Pangilinan sa PNP nga tahoron ang katungod sa mga katawhan sa pagpahigayon og malinawon nga protesta ug ipatuman ang maximum tolerance.

Sa iyang pahayag, gibutyag sa senador ang kamahinungdanon sa pagmintinar sa kalinaw ug seguridad samtang gipanalipdan ang katungod sa matag Pilipino nga gawasnong mopahayag sa ilang mga opinyon.

Sumala kang Pangilinan, parehas nga Pilipino ang mga pulis ug mga nagprotesta nga adunay usa ka tumong, lakip na ang pagbaton og desenteng panginabuhi, luwas nga komunidad ug mas maayong kaugmaon alang sa ilang mga pamilya.

Tungod niini, gihangyo niya ang mga pulis nga atubangon ang mga malinawong nagprotesta uban ang pagsabot, pagpugong sa kaugalingon ug pagtahod.

Gikanayon usab sa senador nga dili angay ikaulaw ang pagpahigayon og malinawon nga protesta taliwala sa pag-abot sa mga lider ug delegado gikan sa nagkalain-laing nasud alang sa ASEAN Summit.

-- ADVERTISEMENT --

Hinuon, matud pa niya, usa kini ka oportunidad aron mapakita sa internasyonal nga komunidad nga kabahin sa demokrasya sa Pilipinas ang kagawasan sa pagpahayag sa opinyon ug pagtahod sa nagkalain-laing panglantaw.

Matud pa ni Pangilinan nga kinahanglan masiguro ang kaluwasan sa tanan samtang hatagan og higayon ang matag Pilipino nga ipadayag ang ilang mga reklamo ug kabalaka.