Magpadayon ang epekto sa southwest monsoon o habagat nga magdala og kalat-kalat nga pag-ulan ug pagkidlat-pagdagundong sa dakong bahin sa Luzon ug Visayas ning Dominggo sa gabii, sumala sa Philippine Atmospheric, Geophysical and Astronomical Services Administration (PAGASA).
Sumala sa weather bulletin sa PAGASA, makasinati og kalat-kalat nga pag-ulan ug thunderstorms ang Metro Manila, Ilocos Region, Cordillera Administrative Region, Western Visayas, Zambales, Bataan, Tarlac, Pampanga, Bulacan, Cavite, Laguna, Batangas, Rizal, Occidental Mindoro, Oriental Mindoro, Romblon, ug Palawan.
Gilauman usab nga makasinati og pulu-pulong pag-ulan o thunderstorms ang ubang bahin sa Luzon ug Visayas, samtang ang Mindanao makasinati sa susamang kahimtang sa panahon tungod sa localized thunderstorms.
Nagpasidaan ang PAGASA nga ang kusog nga pag-ulan mahimong hinungdan sa pagbaha ug pagdahili sa yuta sa mga apektadong lugar.
Samtang, nagpadayon usab ang weather bureau sa pagmonitor sa usa ka low pressure area (LPA) nga nahimutang sa gibana-banang 1,800 kilometro sa sidlakan sa Eastern Visayas, sa gawas sa Philippine Area of Responsibility (PAR).
Sumala sa PAGASA, ubos pa ang posibilidad nga ang LPA mahimong usa ka tropical depression sulod sa sunod nga 24 ka oras.
