Dili na kinahanglan ipakita ang purchase booklet sa mga senior citizen aron makakuha og 20% nga diskwento sa tambal ug medical devices sa mga botika ug tindahan nga lisensyado sa Food and Drug Administration (FDA).
Kini base sa FDA Circular No. 2025-005 nga gipagawas kagahapong adlawa, subay sa DOH Administrative Order No. 2024-0017 nga nagtumong sa pagpamenos sa mga requirements ug pagwagtang sa sobrang pas-unon sa mga senior citizen.
Apektado sa maong pulisiya ang tanang establisyemento nga adunay FDA license nga namaligya og medisina ug medical devices lakip na ang mga botika, pharmacy, tindahan sa over-the-counter nga tambal, ug optical shops.
Aron makakuha og diskwento, igo na nga ipakita ang ID nga nagapamatood nga Filipino ug 60 anyos pataas, sama sa:Senior Citizen ID gikan sa Office of Senior Citizens Affairs (OSCA);Pasaporte,O laing government-issued ID nga adunay petsa sa pagkatawo (sama sa driver’s license, voter’s ID, SSS/GSIS ID, PRC ID, o postal ID).
Ang mga molapas sa maong balaod manubag ubos sa Republic Act No. 9994 (Expanded Senior Citizens Act of 2010), nga adunay silot nga duha hangtod unom ka tuig nga pagkabilanggo ug multa nga P50,000 hangtod P200,000.
