Gisuportahan sa Malacañang ang sugyot balaod-non nga anti-espionage bill nga gipasar na sa House of Representatives sa third ug final reading.
Matud ni Palace Press Officer Undersecretary Claire Castro, wala pa makita ni Pangulong Ferdinand Marcos Jr. ang bersyon sa sugyot nga gipasar sa Kamara, busa wala pa siyay pinal nga posisyon kabahin niini.
Apan, andam ang Presidente nga susihon ang sulod sa bill, ilabina kung gikinahanglang pagbag-o aron matubag ang bag-ong pamaagi sa espionage o pagpang-ispiya ug uban pang kalihokan nga mahimong makadaot sa seguridad sa nasud.
Pasiugda usab ni Castro nga dili gusto sa Presidente nga adunay mga Filipino nga magbudhi sa nasud ug sa ilang mga kauban nga Pilipino.
Dugang pa niya, kung makatabang kini sa nasud ug husto ang sulod sa maong sugyot, dili kini babagan sa Presidente.
Samtang, giila sa Malacañang ang mga pagsupak ug kabalaka sa publiko, lakip ang mga isyu kabahin sa human rights ug uban pang civil rights.
Katungod usab sa mga mosupak nga ipahayag ang ilang mga objection, suhestiyon, ug opinyon aron marepaso ug mahatagan og konsiderasyon samtang gihisgutan ang panukala.
Sa pagkakaron, wala pa nahisgutan kung i-certify ba sa Presidente isip urgent ang maong sugyot o kung ipadayon ba kini sa Senado.
