Nanumpa na kang Pangulong Ferdinand Marcos Jr. sa palasyo sa Malakanyang ang bag-ong gituboy nga kalihim sa Department of Transportation (DOTr) nga si Secretary Vince Dizon.
Gihatagan og gibug-aton sa Presidente ngadto kang Dizon ang pagpadali sa mga proyekto sa sistema sa transportasyon aron maibanan ang kalisod sa mga sumasakay sa pagpauli sa ilang tagsa-tagsa ka trabaho matag adlaw.
Matud pa ni Dizon nga ang direktiba ni PBBM mao ang pagduso sa Public Private Partnerships.
Lakip sa mga prayoridad sa Presidente mao ang pagpaspas sa subway project gumikan giisip niini nga game changer, ang north-south commuter railway project, airport, ug mga pantalan.
Gibutyag usab ni Dizon nga iyang palig-unon ang Edsa busway gumikan dako nga butang kini sa mga sumasakay ug makapagaan niini ang kalisod sa pagbiyahe sa mga pasahero.
Sumala pa sa kalihim, dili kini pabor nga tangtangon ang bus carousel sa EDSA, apan, mangita kini og pamaagi aron mapalambo ang serbisyo sa EDSA busway ug pabor usab si Dizon nga i-privatize ang Edsa busway.
Samtang, gipahibalo ni Sec. Dizon nga dili na magpadayon ang gikatakda nga implementasyon sa full cashless toll collection sa expressways nga magsugod unta sa March 15.
