Nagpahayag si Department of the Interior and Local Government (DILG) Secretary Jonvic Remulla nga nagkagamay ang suplay sa shabu sa Pilipinas, base sa pagsaka sa presyo niini sa merkado.
Gikan sa kanhing ₱3,800 kada gramo kaniadtong 2022, misaka na ngadto sa gibanabanang ₱6,800 kada gramo karong 2026 ang presyo sa maong ilegal nga droga, nga kagbang sa hapit 70 hangtod 74 porsiyentong pagsaka.
Sumala kang Remulla, timailhan kini nga naglisod ang mga sindikato sa pagkuha ug pagpasulod sa suplay sa shabu tungod sa mas gipakusgang kampanya sa gobyerno batok sa ilegal nga droga, ilabi na sa pagpugong sa pagsulod niini sa Pilipinas.
Gihimo sa kalihim ang maong pahayag human gipresentar sa mga otoridad ang 200 ka kilo nga shabu nga nasakmit sa Manila International Container Port (MICP) kaniadtong Oktubre 15, gikan sa usa ka kargamento nga gikan sa Laos.
Base sa pagbana-bana, mokabat sa ₱1.36 bilyon ang kantidad sa maong nakumpiskang droga.
Dugang pa ni Remulla nga nakasentro ang estratehiya sa kasamtangang administrasyong Marcos sa pagdakop sa dagkong tinubdan ug tigsuplay sa ilegal nga droga, imbes nga magpahigayon og madugong operasyon.
Apan bisan pa sa pagtaas sa presyo, wala kini magpasabot nga hingpit nang nawala ang ilegal nga droga sa nasud.
