Nakaresulta sa mga paglangan ug pagkansela sa biyahe ang sunod-sunod nga bomb threats sa nagkadaiyang tugpahanan sa Europe, nga nakaapekto sa kapin 25 hangtod 30 ka flights sa miaging mga adlaw.
Gikan kini sa unang pito ka flights nga naapektuhan kaniadtong Martes, Nobyembre 3, 2026, ug misunod ang ikaduhang bugso sa mga peke nga bomb threat sa nagkadaiyang bahin sa Europe.
Lakip sa mga naapektuhan ang mga flight sa Rome, Prague ug Poland. Sa Warsaw, Poland, usa ka flight sa LOT Polish Airlines gikan sa London ang gipatuyok ngadto sa Modlin Airport, hinungdan sa temporaryong pagsira sa tugpahanan samtang gisusi ang eroplano.
Sa Rome, pipila ka flights sa Ryanair ug usa ka Finnair flight ang gi-eskortan sa mga Eurofighter jet sa Italian Air Force sa wala pa luwas nga makatugpa sa Rome-Fiumicino Airport alang sa bomb screening.
Upat usab ka eroplano nga paingon sa Václav Havel Airport sa Prague ang nakadawat og susamang hulga, apan walay nakit-ang eksplosibo human sa inspeksiyon sa bomb squad ug sniffer dogs.
Nakaapekto usab ang mga hulga sa mga biyahe paingon sa Bulgaria, Spain, Austria ug Belgium, lakip ang mga flights sa pipila ka airlines sama sa Wizz Air, Lufthansa ug EasyJet.
Gikumpirma sa mga awtoridad nga walay nakit-ang eksplosibo o kadudahang butang sa mga eroplano nga gisusi. Giisip ang mga hulga isip mga malisyosong peke nga pahibalo, apan wala pa matino kung kinsa ang responsable niini.
Samtang, nagpasidaan ang pipila ka aviation security analyst nga posibleng kabahin kini sa gitawag nga hybrid warfare, nga nagtinguha sa pagsamok sa operasyon sa transportasyon ug pagsulay sa kahandam sa mga sistema sa seguridad. Apan gipunting sa European Union nga sayo pa aron itudlo ang bisan unsang nasod o grupo isip responsable samtang nagpadayon ang imbestigasyon.
Sa ilalom sa balaod sa European Union nga EU261, bisan pa nga mahimong dili kwalipikado sa cash compensation ang mga pasahero kon ang pagkansela o paglangan tungod sa mga kahimtang nga dili kontrolado sa airline, nagpabilin ang ilang katungod sa pag-atiman. Lakip niini ang pagkaon, mainom, hotel, ug transportasyon kon gikinahanglan, ingon man ang kapilian sa refund o laing flight kung makansela ang biyahe.
Giawhag sa mga awtoridad ang mga pasahero nga susihon una ang kahimtang sa ilang flights online sa dili pa moadto sa tugpahanan samtang nagpadayon ang hugot nga mga lakang sa seguridad sa Europe.
